《大世代 OVERLAP》音樂會

今年初，一首〈樂壇已死〉掀起熱話，小克、吳林峰、王雙駿將12個不同音樂單位串聯，透過回應本地觀眾對香港音樂產業嘅批判，勉勵當下新晉音樂人，帶出年輕並不等於抵死嘅訊息，餘響尤在。

半年後，香港疫情放緩，自六月起大家終於可以重新搞騷睇騷，然而如今登上紅館、九展Star Hall、中環海濱舞台嘅面孔與兩年前大不相同，各場大大小小嘅獨立音樂會更係大洗牌，真正做到百花齊放。

從業界視角，最驚喜嘅係見到新一代樂迷們不再受類型風格所限，今日跟住流行歌手現場大合唱後，聽晚就喺Post-Rock音牆中嗌到聲都沙埋，weekend再去Hip-Hop show跳到爆哂汗 —— 凡係觸動到自己，佢哋就會瞓身買飛到場盡情玩，對香港音樂不同面向嘅接受力，比我哋呢班行內人有過之無不及。

以往香港人總以「接棒」去理解不同世代音樂人之間嘅關係，彷彿後者一定會走前者嘅路，前者又追隨住更前者嘅腳步；但現實早就唔係咁樣了，新世代嘅本地音樂人可以輕鬆經營出過百萬view數嘅大熱歌曲，中生代當中亦有創作人在自我挑戰中進化，不同世代嘅潮流風格係完全可以同時發生。一首〈樂壇已死〉，或者係香港音樂開始超脫「壇」呢個格局嘅開場曲。

八月首個週末，〈樂壇已死〉幕後班底策劃《大世代OVERLAP》，由王雙駿擔任音樂總監，以「世代交疊」為概念，精選香港音樂場景中，不同世代不同類型中獨當一面嘅歌手與樂隊，齊集旺角麥花臣場館舉行一連三晚主題音樂會。

【8月6日· 女聲擔綱】

岑寧兒、王嘉儀、陳嘉、WHIZZ
 

【8月7日· 重構音樂潮流】

恭碩良 with JunkUnit feat. Eugene Pao、一丁、TIAB、ProdiG

【8月8日· 樂隊集結】

RubberBand、R.O.O.T、The Hertz、Charming Way、樂壇已死大合唱團

昭映製作、ELF Asia、Daymaker Creatives 合辦

《大世代 OVERLAP》音樂會

日期：8月6日、7日及8日

時間：晚上八時

地點：旺角麥花臣場館

門票 : 單日票HKD$580; 世代 Overlap大包圍 3-Day Pass HKD$1500

(TickCats 將額外收取每張HKD$12 手續費用)

*為更靈活配合政府防疫措施，音樂會將作現場劃位，按觀眾入場實際次序處理，不設留位安排。