SAY SUE ME ‘The Last Thing Left’ 2023 Tour 香港站

1994年10月14日，喺數以十萬計目擊者注視下，一對情侶於美國加州某餐廳內落單、食早餐、討論日常、討論打劫，決定打劫，掹槍，起身、然後響起「標」一聲 —— 畫面定格，轉黑，「PULP FICTION」二字隨住〈Misirlou〉綿密而剛猛嘅結他掃射緩緩升起。對於香港戲院，又或許多喺內陸城市長大嘅電影觀眾，呢一幕有機會係佢哋人生第一次接觸衝浪搖滾（surf rock）嘅時刻。

順應六十年代美國西岸，尤其加州海岸一帶興起嘅衝浪文化而誕生嘅surf rock，高峰時期足以同全美最受歡迎嘅girl groups同Motown樂派分庭抗禮。經典代表除咗《危險人物》收錄嘅 Dick Dale，仲有名人堂級數嘅 The Ventures，以及無數音樂人奉為編曲聖經嘅 The Beach Boys。

到底點樣嘅聲音，先可以表現出大海無量，海水與海浪之間前堆後擁嘅結構呢？

呢班上世紀嘅樂手利用結他音箱嘅自然回放（guitar amp feedback）原理，造出機械式嘅速彈效果，加上鼓手喺同樣脈衝內各玩不同節拍，營造出一種浪高浪低，整個大海從四方八面湧緊埋嚟嘅刺激感 —— 五十年後，幾個大韓indie仔女喺釜山海邊band房練嘢時開始思考：喂，呢種彈法其實同shoegaze係咪有啲似。

釜山，排喺首爾後嘅韓國第二大城市，除咗係屍殺列車終點站外，亦因其熱帶氣候與穩定嘅風季檔期，成為全球surfing界知名嘅海港都市。喺當地成長結成，Say Sue Me 多次提到家鄉浪聲對佢哋音樂創作嘅影響，不下於 Yo La Tengo、Pavement、Blur、Ride 等由細聽到大嘅歐美獨立名團；第一張EP《Big Summer Night》由開場曲〈Fight the Shark〉到收尾〈Spy on Motorbike!〉，到處能夠聽見六十年代衝浪曲式，與九十年代美式噪音流行美學基因。

根據樂隊後來自己收集返嚟嘅說法，Say Sue Me（下稱SSM）會喺美國樂迷間走紅，似乎係因為佢哋嘅音樂令人感受到一種對時間，而非對地方嘅鄉愁，就我自己嚟講，播 SSM 時會諗起2010前後，聽 Best Coasts、Vivian Girls、The Drums 嗰種純粹，而大西洋對岸嘅樂迷則形容佢哋為 Alvvays 與 Yo La Tengo 混合體。

意外行出國際線嘅 SSM 喺2017年簽約倫敦廠牌 Damnably（廠牌旗下有日本嘅 Otoboke Beaver 同埋香港嘅 DAVID BORING 唷 :3），雙方連線未幾即推出全新EP《Semin》，為年前遭遇車禍，陷入半昏迷狀態嘅創團鼓手籌募醫藥費。

我諗 SSM 另一個吸引自己嘅地方，係你從音樂中已經聽得出佢哋份人牌品好。技術扎實，編曲用聲唔算花巧但細膩有餘，每個轟炸與安靜嘅段落，都可以實在地感受到樂器背後每個崗位嘅情緒，呢樣玩搖滾最基本嘅嘢，佢哋做得好好。由當初開心夾band開心玩，到遇上人生高高低低，喺 SSM 躁動輕快嘅曲式底下，有一種定海神針嘅氣度 —— 某程度上，就好似 Yo La Tengo 首〈Ohm〉畀我嘅感覺，唔係一樣嘅音樂，但係相似嘅甜美安心。

女主唱 Sumi 抱住「再壞嘅事，背後都可以有一個好原因」想法，與樂隊寫下〈Good For Some Reason〉收拾心情 ，按原定計劃繼續錄製第二張大碟。

2018年，Say Sue Me 推出《Where We Were Together》，一張於爽勁與浮躁之間保持絕妙平衡嘅”surf gaze”專輯，大概亦係唔少本地shoegaze迷接觸到 SSM 嘅契機。該碟除咗繼續受西方圈子追捧，意外喺韓國當地引起迴響，一舉入圍韓國大眾音樂賞五項提名，同屆數目僅次於進入上升期嘅 BTS（？！），最終贏得modern rock album/ song兩個獎項。2019年底，SSM 成為首支登上你成日喺YouTube碌到嗰個「Live on KEXP」嘅韓國樂隊，並且第二度參加德州 SXSW，獲評為最佳現場演出之一。

而佢哋再次出現喺 KEXP，已經係美國時間上星期五嘅事。

去年夏天，全球疫情步入尾聲階段，Say Sue Me 喺幾首韓劇插曲熱身後，錄好第三張大碟《The Last Thing Left》，再次入圍韓國大眾音樂賞，與 Black Midi、Wet Leg、Alvvays 等一同入選Reddit ‘Indieheads’群組（會員260萬人）嘅年度專輯名單。比起出道作嘅青春爛漫，見到有浪就衝落海嘅爽勁，現在式嘅 SSM 依然以大海為伴，卻係有時由得浪花濕吓腳，有時天氣好落水踩吓板嘅成熟狀態。

Yo La Tengo 低音結他手 James McNew 係如此形容：靈魂層面嚟講，呢張碟有一種既新鮮，又老練嘅氣場。喺 Say Sue Me 嘅演奏中，我哋可以聽出呢班人對創作音樂嘅愛，亦可以聽到佢哋對過去時光與城市面貌嘅愛；或者由 Sumi 以韓文主唱嘅〈꿈에 (To Dream)〉，最能夠表現出現在式 SSM 嘅動人特質，首歌好似花田上幾片雨雲一樣，有歡樂，有脆弱，愛與失落，人就係咁。

SAY SUE ME ‘The Last Thing Left’ 2023 Tour 香港站

演出單位：SAY SUE ME
日期 : 2023年10月15日（日）
時間：8PM
場地 : 上環德輔道西33號 Soho House Hong Kong, 1/F
票價：$390 on sale now at tickcats.co